Apadriñamento lector co CEIP Praia Xardín

Como tódolos anos, non quixemos rematar o curso sen visitar aos nosos amigos e amigas do CEIP Praia Xardín. A coordinadora da súa biblioteca, Pili, recibiunos na súa casa para que os alumnos dos clubes de lectura do IES Praia Barraña e o alumnado de 1º de EP do CEIP Praia Xardín compartisen un ratiño de lectura ao aire libre. Foi unha preciosa experiencia de lectura compartida, pequenos e maiores gozaron de historias como A que sabe un bico?, Unha familia normal, Unha casa a medida, Chivos, chivóns... e moitas máis. Ao rematar, os padriños recibiron un diploma e un pequeno agasallo, ao igual que os apadriñados. 

Estamos desexando repetir, e andamos a argallar algunha cousiña máis para estes últimos días, manterémosvos informados.

Obradoiro de ilustración con Xulia Pisón

 

Na segunda avaliación visitou a Boiroteca a autora e ilustradora Xulia Pisón, nunha actividade organizada pola Biblioteca e o Equipo de Dinamización Lingüística. Xulia acudiu ao noso centro para traballar co alumnado de 2º de ESO nun obradoiro de ilustración. O obxectivo deste obradoiro, ademais de aprender técnicas para debuxar personaxes, preparar o guion, planificar o deseño de imaxe e texto... é trasladar a novela de María Reimóndez, Corredora, que o alumnado leu neste trimestre, a banda deseñada. Estamos desexando ver os resultados!

Ademais, Xulia tivo a amabilidade de adicar un ratiño aos membros do club de lectura DeBoirolibros, e concederlles unha entrevista que poderedes ler na nosa revista escolar no final do curso.

Con esta actividade contribuimos a dar corpo e presenza na nosa biblioteca ao lema das BE deste curso: "Unha biblioteca escolar en viñetas"

17 MAIO, DÍA DAS LETRAS GALEGAS

 

MES DA CIENCIA

 Novembro, mes da ciencia en galego nas bibliotecas

A última semana do mes de novembro celebrouse na biblioteca o mes da ciencia. O alumnado puido participar en diferentes actividades organizadas polos departamentos de Bioloxía, Física e Química e Matemáticas.

Na biblioteca se fixo unha exposición cunha selección de lecturas relacionadas cos contidos científicos.

25N Día Internacional pola eliminación da Violencia contra as Mulleres

Onte celebrouse o 25 de Novembro que é un día internacional adicado á loita pola visibilización e a eliminación da violencia contra as mulleres e o IES Praia Barraña apoiou esta loita cunha serie de actividades organizadas polos grupos de dinamización e creatividade do centro.

A entrada da mañá recibía aos estudantes cun camiño flanqueado por zapatos vermellos que guiaban a ruta dende o portón á entrada do edificio, onde unha serie de formas agardaban na penumbra do pasillo da entrada. 

A instalación homenaxea a obra "zapatos rojos" da artista mexicana Elina Chauvet, que denunciaba así a brutal estadística de mulleres mortas pola violencia en Ciudad Juárez, México e que finalmente integrou a mera idea da violencia contra as mulleres, sexan de onde sexan.

Xa entrando na penumbra do distribuidor, descubríase un grupo das mulleres do centro, vestidas de luto e cunha mazá na man, o símbolo do estigma e do pecado que se lle presupón á muller dende tempos bíblicos, as cales posaban hieráticas e en silencio, coma mudas testemuñas do horror.

As participantes da performance

A performance tiña unha áncora temporal que permaneceu no centro toda a semana, unha representación de Eva feita nuns bloques e que atoparíamos na recibidor.

Xa no pasillo, un mural manuscrito amosaba a arrepiante relación de vítimas mortais provocadas por esta violencia.

Finalmente, as mulleres manifestaron cunha pancarta no patio a súa preocupación pola violencia contra as mulleres, unidas en sororidade e cunha causa común.

Entrega de Premios do I Concurso de Microrrelatos

CLUBS DE LECTURA

Ao longo do segundo trimestre do presente ano académico 2020/2021, os clubs de lectura “capitaneados” polas profesoras Marieta e Nieves continuaron coa súa andadura lectora. 

 Ao longo deste segundo período do curso as lecturas que se levaron a cabo foron as seguintes: 

 · Relatos de terror, de H. P. Lovecraft 

 · Vestio, de Xosé Miranda 

 · A crueldade de abril, de Diego Ameixeiras 

 Grazas a todas e todos os participantes nesta iniciativa lectora. Esperamos seguir contando con todas e todos vos, e moitas e moitos máis, nesta pequena iniciativa que xorde dende a Biblioteca Escolar do IES “Praia Barraña”.

Namorad@s 2020