Biblioteca do IES Praia Barraña de Boiro: 2020

miércoles, 21 de octubre de 2020

Protocolo de adaptación do uso da Biblioteca Escolar á situación COVID–19 (Ano académico 2020–2021)

Dende o equipo da Biblioteca Escolar do IES “Praia Barraña” desexamos que no presente ano académico 2020–2021, a nosa biblioteca continúe a ser un lugar de goce para a lectura e a información.

Con motivo da especial situación que se está a producir nestes momentos en relación á pandemia provocada polo coronavirus COVID–19, faise necesario establecer un protocolo específico de uso da Biblioteca Escolar co fin de que os/as usuarios/as da mesma podan desfrutar das súas instalacións e recursos con total seguridade, que será revisado e/ou modificado segundo o desenvolvemento do curso e da actual situación sanitaria.

Aplicaranse na biblioteca as normas de uso e funcionamento das aulas ordinarias ademais das que se especifican a continuación:

1.- Entrada

A biblioteca permanecerá aberta e a disposición dos/as usuarios/as da mesma durante os dous períodos de recreo de cada xornada lectiva. Fóra de dita franxa horaria só poderá ser empregada logo de solicitar o correspondente permiso á Dirección do centro e/ou á persoa coordinadora da mesma.

Se fora necesario, poderase limitar o acceso á biblioteca nalgún recreo con motivo do desenvolvemento de actividades dos clubes de lectura, charlas…

A porta da biblioteca permanecerá aberta durante o tempo de uso da mesma para evitar ter que tocala.

O aforo máximo da biblioteca será de 15 persoas.

Non se poderá acceder á biblioteca se o aforo da mesma está completo.

O uso da máscara é obrigatorio en todo momento.

Os/As usuarios/as deberán hixienizar as mans tanto ao entrar como ao saír da biblioteca.

2.- Permanencia na biblioteca

Co fin de manter a distancia de seguridade, só poderán ser empregados os postos de traballo habilitados.

Mentres dure a situación excepcional, non se permitirá o uso de xogos de mesa, ou materiais semellantes.

Postos informáticos:

       − Só se poderán empregar os postos sinalados (dous en total).
       − En cada posto só poderá permanecer un/unha único/a usuario/a.
       − Cada usuario/a, ao rematar de utilízalo, limpará o posto (sempre botando a solución hidroalcohólica sobre o pano, nunca directamente sobre o ordenador).

Ao rematar, os/as usuarios/as da biblioteca hixienizarán os postos de traballo que teñan ocupado (mesa e cadeiras), empregando a solución hidroalcohólica e os panos desbotables que estarán á súa disposición. Despois do seu uso, os panos deberán ser desbotados na papeleira con tapa situada na entrada da biblioteca.

A hixienización dos postos por parte dos/das usuarios/as será unha rutina fundamental no protocolo de uso da Biblioteca.

O profesorado interesado en utilizar a biblioteca como aula deberá reservar previamente o espazo anotándoo no cadrante que a tal efecto estará dispoñible na sala de profesorado e deberá aterse ás seguintes normas de uso:

       − Indicar o día, o horario e o grupo de alumnado co que se acudirá á biblioteca (informar previamente á Dirección do centro e/ou á persoa coordinadora da mesma).
       − Vixiar o correcto uso da sala, a desinfección dos materiais e postos empregados e a ventilación do espazo, de acordo co plan xeral de actuación ante a COVID–19.
       − Non alterar a distribución das mesas e as cadeiras.
        − Cumprir estritamente as normas de uso da biblioteca perante a COVID–19, recollidas no presente Documento.

3.- Servizo de préstamo

O préstamo e devolución de materiais farase de forma habitual pero sempre de xeito persoal, sen intermediarios/as.

Non se poderán coller libros dos estantes. En caso de precisar un libro ou material o profesorado de garda de biblioteca será o encargado de coller o mesmo dos andeis. Desta maneira, tentarase diminuír a manipulación dos libros.

Facilitarase un servizo de préstamo online a través do correo electrónico da propia biblioteca (boiroteca@gmail.com). A petición será atendida á maior brevidade polo equipo de biblioteca, que indicará a data de recollida do material solicitado.

De cara a facilitar o préstamo online, poderase consultar os libros e materiais dispoñibles na biblioteca no seguinte enderezo, ou co seguinte código QR

Os materiais devoltos deberán permanecer illados na caixa habilitada para tal fin por un período de 24 horas.

O profesorado de garda de biblioteca será o encargado de devolver ao seu lugar os libros / materiais devoltos unha vez transcorrido o período de illamento antes indicado.

Dada a especial sensibilidade dos préstamos e devolucións, ningún membro da comunidade educativa poderá coller e/ou devolver materiais da biblioteca sen a supervisión do equipo de biblioteca ou fóra do horario de apertura da mesma.

4.- Medidas de hixiene

Ventilación: Dado que a ventilación é unha das medidas máis eficaces para minimizar a transmisión do virus, as xanelas da biblioteca permanecerán abertas o máximo tempo posible.

O profesorado de garda de biblioteca limpará o mostrador e o teclado antes e despois da súa estancia, así como os materiais que usase: cadeira, tesoiras, bolígrafos, etc.

Uso obrigatorio do xel desinfectante á entrada e á saída para todos/as os/as usuarios/ as sen excepción (docentes, non docentes e alumnado).

5.- Posibles escenarios consecuencia da pandemia

a) Presencial:
− Seguiranse as medidas arriba expostas.
b) Semipresencial:
− Durante o ensino na casa empregarase a conta de correo da biblioteca para xestionar os préstamos.
− Os libros entregaranse nas aulas o día de clase presencial por membros do equipo de biblioteca.
− Para os días de ensino presencial seguirase o protocolo exposto no apartado 3.
c) Non presencial:
− Empregarase a conta de correo da biblioteca para xestionar os préstamos.
− Os envíos e recollida dos libros realizaranse, segundo se acorde, a través de Protección Civil ou recollida en centro por parte dalgún membro da familia.

6.- Outros aspectos

O equipo de biblioteca vixiará o estrito cumprimento destas normas.

Todas as actividades planificadas polo equipo de biblioteca deberán cinguirse a estas normas, priorizándose sempre as accións virtuais e aquelas que garantan a seguridade de toda a comunidade educativa.

Estas normas poderán sufrir variacións en función da evolución da situación sanitaria.

Mantéñense todas as normas de uso da biblioteca que non son incompatibles coa situación provocada pola COVID–19; entre outras:

− Débese observar o máximo silencio posible.
− Non está permitido comer nin beber.
− Non está permitido o uso do teléfono móbil.
− Débense respectar e seguir sempre as indicacións do persoal do equipo de biblioteca.

24 de outubro, Día das Bibliotecas

viernes, 2 de octubre de 2020

Inicio do Curso 20/21

Ola de novo, sede benvid@s á vosa Biblioteca onde intentaremos darvos o mellor posible, ainda nestes tempos de precariedade.

A novidade máis sinalada neste curso é que a biblioteca ten que ceder o seu espacio para ser utilizada como clase, polo que o seu horario de atención ao alumnado limítase aos dous recreos diarios.

A pandemia tamén nos obliga a limitar o aforo a 15 persoas como máximo.

Polo demáis, poderedes seguir collendo libros para levar a casa e seguiremos promovendo e deseñando actividades e eventos educativos e divertidos como ata agora.

Sen mais, desexarvos un bo curso e moita paciencia coas medidas que este particular momento nos obliga a tomar .

Saúdos!